Booster Dose: కరోనా ప్రమాదాన్ని తగ్గిస్తున్న వ్యాక్సిన్ బూస్టర్ డోస్.....తాజా అధ్యయనంలో సంచలన ఫలితాలు..!!!.

 ప్రపంచ వ్యాప్తంగా రకరకాల వ్యాక్సిన్లు అందుబాటులోకి వచ్చిన తర్వాత కూడా కరోనా మహమ్మారి ఉద్ధృతి పెద్దగా తగ్గడం లేదు. ఇప్పటికే కొన్ని పరిశోధనలు మూడో డోసు ప్రాముఖ్యతను నొక్కి చెప్పాయి.

తాజాగా ఇజ్రాయిల్ ఇదే విషయాన్ని స్పష్టం చేసింది. మూడో డోసు వ్యాక్సిన్ తీసుకున్న తర్వాత SARS-CoV-2 పాజిటివ్ ప్రభావం తగ్గిందని ఆ దేశంలో నిర్వహించిన అధ్యయనం స్పష్టం చేసింది. ఫైజర్-బయోఎంటెక్ వ్యాక్సిన్ మూడో డోసు సంక్రమణ ప్రమాదాన్ని గణనీయంగా తగ్గించిందని పేర్కొంది. ఆ దేశ ఆరోగ్య మంత్రిత్వ శాఖ శుక్రవారం వెలువరించిన నివేదిక ప్రకారం.. మూడో డోసు తీసుకున్న 2 వారాల తర్వాత SARS-CoV-2 ప్రమాదం 10 రెట్లు తగ్గింది.

ఈ విషయాలను గుర్తించడానికి పరిశోధకులు హెల్త్ మెయింటనెన్స్ ఆర్గనైజేషన్ డేటాను ఉపయోగించారు. థర్డ్ డోస్ తీసుకున్న ఓ వారం తర్వాత పాజిటివ్ కేసులు సగానికి తగ్గాయని, రెండో వారం తర్వాత మరింత ప్రభావం చూపిందని నివేదించింది.

ఇజ్రాయెల్‌లో పెరుగుతున్న డెల్టా కేసులు..

డెల్టా వేరియంట్ అధికంగా వ్యాప్తి చెందడంతో ఇజ్రాయిల్‌లో కరోనా కేసులు పెరుగుతున్నాయి. కరోనా ప్రారంభమైనప్పటి నుంచి ఇప్పటి వరకు సోమవారం గరిష్ఠంగా 10,947 కేసులు నమోదయ్యాయి. జులై 31 తర్వాత వృద్ధుల్లో పాజిటివ్ కేసులు వృద్ధి చెందుతున్నాయి. ఆర్ఎన్ఏ టీకా మూడో డోసు 60 అంతకంటే ఎక్కువ వయస్సు ఉన్న వ్యక్తులకు అందిస్తున్నారు. ఆగస్టు 29న ఇజ్రాయిల్ 12 ఏళ్లు పైబడిన వారికి వ్యాక్సిన్ అందించేందుకు బూస్టర్ ప్రోగ్రామ్‌ను విస్తరిస్తున్నట్లు ప్రకటించింది. ఇప్పటి వరకు 2.1 మిలియన్లకు పైగా ప్రజలు మూడో డోసు అందుకున్నారని ప్రభుత్వం స్పష్టం చేసింది.

కరోనా బూస్టర్లు ఇన్ఫెక్షన్లను తగ్గిస్తాయనడంలో ఆశ్చర్యం లేదని జాన్స్ హాప్‌కిన్స్ వర్సిటీ ఎపిడెమియాజిస్ట్ డేవిడ్ డౌడీ చెప్పారు. ఎవరికైనా స్వల్పకాలిక రోగనిరోధక శక్తిని అందించడమే మీ లక్ష్యం అయితే, ఇందుకు మార్గం బూస్టర్ డోస్ అనడంలో ఎలాంటి సందేహం లేదని తెలిపారు. ప్రస్తుత టీకాలు డెల్టా వేరియంట్ కు వ్యతిరేకంగా ప్రభావవంతంగా పనిచేస్తాయనే ఆధారాలు ఉన్నాయని చెప్పారు. అయితే ఈ బూస్టర్ షాట్ కొద్ది కాలానికే రక్షణ కవచంగా పనిచేస్తాయని, ఈ భద్రత ఎంతకాలం ఉంటుందనేది అస్పష్టంగా ఉందని అభిప్రాయపడ్డారు.